सोमबार, ६ श्रावण, २०७६ Monday, 22 July, 2019

गरीब जनताको स्वास्थ्य बीमावापतको रकम सरकारले व्यहोर्ने

“गरीबीको रेखामुनि रहेका जनता कति छन्, यकिन तथ्याङ्क आउन लागेको छ, सो आएपछि उहाँहरुको स्वास्थ्य बीमावापतको प्रिमियम रकम सरकारले व्यहोर्छ ।”

काठमाडौं । अर्थमन्त्री डा युवराज खतिवडाले निरपेक्ष गरीबीको रेखामुनि रहेका जनताको स्वास्थ्य बीमावापतको रकम सरकारले व्यहोर्ने तयारी गरिरहेको बताएका छन् ।

सामुदयिकस्तरबाट सञ्चालित नेपाल आँखा अस्पतालको ४५औँ वार्षिकोत्सवमा उनले सबै जनतालाई स्वास्थ्य बीमामा आवद्ध गराउने सरकारको नीति रहेको बताए । 

उनले भने, “गरीबीको रेखामुनि रहेका जनता कति छन्, यकिन तथ्याङ्क आउन लागेको छ, सो आएपछि उहाँहरुको स्वास्थ्य बीमावापतको प्रिमियम रकम सरकारले व्यहोर्छ ।” हाल ७० वर्षभन्दा माथिका ज्येष्ठ नागरिकको रु एक लाखवापतको प्रिमियम रकम सरकारले स्वास्थ्य बीमा बोर्डमार्फत व्यहोर्ने गर्छ । विसं २०७२ चैत २५ गतेदेखि सुरु भएको स्वास्थ्य बीमा कार्यक्रम हाल ४२ जिल्लामा कार्यान्वयनमा आएको छ । हालसम्म ती जिल्लाका १५ लाख ७१ हजार ४८८ नागरिक बीमामा आवद्ध छन् ।

बोर्डले एक वर्षभित्र सबै जिल्लामा बीमाको कार्यक्रम लागू गर्ने तयारी गर्दैछ । मन्त्री खतिवडाले स्वास्थ्य बीमाको पहुँचका साथमा स्वास्थ्य प्रदायक संस्थाको जनशक्ति, उपकरण र सेवा थप गुणस्तरीय बनाउन आवश्यक रहेको बताए । यसका लागि स्थानीय, प्रदेश र सङ्घको ध्यान जानुपर्ने उनको भनाइ थियो । “नेपाल आँखा अस्पतालले पुर्‍याएको योगदान महत्वपूर्ण छ, आगामी दिनमा यसलाई आँखा उपचार तथा जनशक्ति तयारी क्षेत्रमा उत्कृष्ट केन्द्र बनाउन सरकारले सहयोग गर्नेछ”, मन्त्री खडिवडाले भने ।

बालबालिकाको समग्र स्वास्थ्य सुधारका लागि बालपोषण, सुनौला हजार दिन, बाल संरक्षण अनुदान, खाद्यन्नमा आधारित पोषणजस्ता कार्यक्रम कार्यान्वयनमा आएको र आगामी दिनमा विद्यालय स्वास्थ्य शिक्षामा थप लगानी गरिने उनले जानकारी दिए । व्यावसायिक संस्थालाई सामाजिक र वातावरणीय उत्तरदायित्व पूरा गर्न उहाँले आग्रह गरे ।

अस्पतालका स्वास्थ्य निर्देशक डा कलमबहादुर खड्काले अस्पतालले आफ्नो सेवाको दायरालाई फराकिलो बनाउँदै आँखा स्वास्थ्यसम्बन्धी जनशक्ति उत्पादनमा ध्यान दिई पठनपाठनमा पनि महत्व दिएको बताए । अस्पताल सञ्चालक समितिका अध्यक्ष विश्वकान्त मैनालीले आँखा उपचार सेवा, जनशक्ति उत्पादनका क्षेत्रमा अस्पताललाई नमूना अस्पताल बनाउने लक्ष्य रहेको जानकारी दिए ।

विसं २०३० चैत २६ गते सो अस्पताल स्थापना भएको हो । अस्पतालले पछिल्लो समय आँखा एमडी तहको जनशक्ति उत्पादन गरिरहेको छ । सामुदायिक अस्पतालमध्ये सो अस्पताल उत्कृष्ट छ ।  रासस

प्राप्त प्रतिकृयाहरू

यसमा तपाइको मत

सम्बन्धित समाचार
धेरै पढिएको
ट्वीटरमा