शुक्रबार, २९ कार्तिक, २०७६ Friday, 15 November, 2019

भानु नगरपालिकामा कर्मचारीलाई भानुभक्तीय 'बिर्खे टोपी' अनिवार्य

राष्ट्रिय विभूति आचार्यको पहिचान जोगाउनुका साथै प्रचारप्रसारका लागि भानुभक्तीय टोपी लगाउन कर्मचारीलाई आग्रह गरेबमोजिम कर्मचारीले बिर्खे टोपी लगाउन शुरु गरेको
आदिकवि भानुभक्तीय बिर्खे टोपीमा तनहुँको भानु नगरपालिकाका कर्मचारी । फोटो: कृष्ण न्यौपाने । रासस

 

काठमाडौँ। तनहुँको भानु नगरपालिकाका कर्मचारीले भानुभक्तीय बिर्खे टोपी लगाउन शुरु गरेका छन् । नेपाली भाषाका धरोहर आदिकवि भानुभक्त आचार्यको नामबाट नामकरण गरिएको भानु नगरपालिकाका कर्मचारीले आइतबारबाट बिर्खे टोपी लगाउन शुरु गरेका हुन् ।

नगर कार्यपालिकाको बैठकले असार १ गतेबाट कर्मचारीले अनिवार्य रुपमा बिर्खे टोपी लगाउनुपर्ने निर्णय गरेपछि उक्त निर्णयलाई व्यवहारमा लागू गरिएको नगरपालिकाका प्रमुख प्रशासकीय अधिकृत राजेन्द्रदेव पाण्डेले जानकारी दिए । उनले भने, “भानुभक्तको नामबाट नामाङ्कन भएको नगरपालिकामा आउने सबैलाई भानुभक्तीय टोपीको बारेमा जानकारी दिन र पहिचान झल्काउन बिर्खे टोपी लगाउन शुरु गरेका हौँ ।”

पाण्डेका अनुसार नगरपालिकाभित्र कार्यरत १०० भन्दा बढी कर्मचारीले बिर्खे टोपी लगाउन शुरु गरेका छन् । राष्ट्रिय विभूति आचार्यको पहिचान जोगाउनुका साथै प्रचारप्रसारका लागि भानुभक्तीय टोपी लगाउन कर्मचारीलाई आग्रह गरेबमोजिम कर्मचारीले बिर्खे टोपी लगाउन शुरु गरेको नगरपालिकाका प्रमुख उदयराज गौलीले बताए । 

उनले भने, “आदिकविको सम्मान र प्रचारप्रसार गर्ने उद्देश्यसहित यस्तो नियम लागू गरिएको हो ।” उनका अनुसार नगरपालिकाले भानु जयन्तीको अवसरमा असार २९ गते नगर क्षेत्रभित्र सार्वजनिक बिदा दिने तयारी गरेको छ । 

अपाङ्गता भएकालाई मौरीघार वितरण

तनहुँको शुक्लागण्डकी नगरपालिकास्तरीय अपाङ्गता सञ्जालले अपाङ्गता भएका व्यक्तिलाई आयआर्जनमा सहयोग गर्ने उद्देश्यसहित मौरीघार वितरण गरेको छ । 

नगरपालिकाभित्रका विभिन्न वडामा बसोबास गर्ने २० अपाङ्गता भएका व्यक्तिलाई सञ्जालले मौरीसहितको घार वितरण गरेको हो ।

मौरीपालनसम्बन्धी आधारभूत ज्ञान दिएर उनीहरुलाई मौरीघार वितरण गरेको सञ्जालका अध्यक्ष बालकुमारी रेग्मीले जानकारी दिए। उनका अनुसार रु आठ हजार मूल्य पर्ने मौरीघार निःशुल्क वितरण गरिएको हो । 

अपाङ्गता भएका व्यक्तिलाई मौरीघार वितरण गर्दै शुक्लागण्डकी नगरपालिकाका उपप्रमुख सविता रसाइलीले अपाङ्गता भएका व्यक्तिलाई आत्मनिर्भर बनाउन स्थानीय सरकार प्रतिबद्ध रहेको बताए । रासस। 

प्राप्त प्रतिकृयाहरू

यसमा तपाइको मत

सम्बन्धित समाचार
धेरै पढिएको
ट्वीटरमा