गलत तथा भ्रामक सूचनाविरुद्ध लड्न अनलाइन कोर्ष सार्वजनिक

काठमाडौँ: गलत तथा भ्रामक सूचनाबारे अध्ययन गर्न चाहनेका लागि नेपालस्थित अमेरिकी दूतावासको सहयोगमा युथ इनोभेसन ल्याबले अनलाइन कोर्ष सार्वजनिक गरेको छ । 

शुक्रबार काठमाडौँमा एक कार्यक्रम आयोजना गर्दै युथ इनोभेसन ल्याबका प्रबन्ध निर्देशक प्रदीप खतिवडा र दूतावासका सार्वजनिक मामिला प्रमुख ग्यारेट ई. विल्करसनले संयुक्त रूपमा कोर्ष सार्वजनिक गरेका छन् ।

शिक्षा डट अर्गमार्फत सार्वजनिक गरिएको ‘गलत र भ्रामक सूचना सम्बन्धी बुझाइ र यस विरुद्धको लडाईं’ कोर्षमा पाँच ओटा मोड्युल रहेका छन् । यो कोर्ष काठमाडौँ पोस्टका पूर्व प्रधान सम्पादक अखिलेश उपाध्यायको नेतृत्वमा विकास गरिएको पाठ्यक्रममा हो।

कोर्षमा राजन पोखरेलले विकास गरेको पहिलो मोड्युलमा परम्परागतदेखि नयाँ मिडियासम्म नेपालको विकसित मिडिया परिदृश्यको अन्वेषण गरिएको छ ।दीपक अधिकारीले तयार पारेको दोस्रो मोड्युल व्यक्तिहरूलाई प्रभावकारी तरिकाले तथ्य-जाँच गर्ने प्रविधिहरू प्रदान गर्न र गलत र भ्रामक सूचनाहरू विरुद्ध लड्न मिडिया साक्षरता प्रवर्द्धन गर्नमा केन्द्रित रहेको छ ।

त्यसैगरी अवास्ना पाण्डेले तेस्रो मोड्युलको नेतृत्व गरेकी छिन् । यो मोड्युल नेपालमा सीमान्तकृत समुदायहरूलाई लक्षित गरी फैलाइने गलत र भ्रामक सूचनाहरूविरुद्ध लड्न र यी समूहहरूमा यसको प्रभाव कस्तो हुन्छ भन्ने कुराको मूल्याङ्कनमा केन्द्रित छ ।

त्यस्तै, अन्तिम कोर्ष लक्ष्मी महर्जनले विकास गरेको मोड्युल गलत  र भ्रामक सूचना विरुद्ध लड्न विश्वव्यापी रूपमा अवलम्बन गरिएका उत्कृष्ट अभ्यास, कानुनी र नियामक रणनीतिहरूमा केन्द्रित छ । 

हरेक मोड्युल सकिएपछि त्यससम्बन्धी टेस्टमा सहभागी हुनुपर्छ । ८० प्रतिशतभन्दा बढी ल्याएको खण्डमा मात्र नयाँ मोड्युलमा सहभागी हुन सकिन्छ । यसरी जसले चार ओटै मोड्युल सक्छ, उसले अन्तिममा युथ इनोभेसन ल्याबको तर्फबाट डिजिटल सर्टिफिकेट पाउने व्यवस्था गरिएको छ ।